NAGA CITY — Bagaman na-i-turn over na sa mga magulang, binabantayan pa rin ngayon ng Barangay Dinaga sa Naga City, ang mga dayong kabataan sa kasentruhan na naaktuhan nang CCTV Camera na gumagamit ng rugby.
Ayon kay Punong Barangay, Ma. Cristina Intia, nitong nakaraang Peñafracia Fiesta, wala namang naobserbahan ang mga opisyal na anumang kaparehong insidente bukod sa talamak na dukutan ng mga dayo ring mandurukot.
Subalit may mga na-rescue sila noong mga nakaraang buwan at properly turn over na sa mga magulang. Ang iba rito mula pa sa bayan ng Pasacao at kalapit na lugar.
Kaugnay nito, panawagan ng Punong Barangay sa mga magulang na i-monitor ang mga anak na teenager, kilalanin ang mga barkada, at alamin ang mga lakad nito kung aalis man sa bahay.
Samantala, malaking tulong ang 25 CCTV camera sa barangay na nakakabit sa kasentruhan ng lungsod upang mag-monitor at mapadali ang paghuli sa mga nasasangkot sa krimen.
Patuloy rin ang panawagan ng mga opisyal sa publiko na maging maingat at siguruhing mababantayan ang mga gamit upang maiwasang madukutan.
