Siniguro ng dating pangulo ng Association of Structural Engineers of the Philippines na si Engineer Ronaldo Ison na karamihan sa mga high-rise structures sa National Capital Region (NCR) gaya ng mga condominium at opisina ay “generally safe” sakaling tumama ang malakas na lindol sa Metro Manila.
Sa isang panayam, ipinaliwanag ni Ison matibay ang disenyo ng mga modernong gusali dahil gumagamit na ang mga ito ng shear walls, o mga kongkretong pader na nakatutulong upang makayanan ang matinding pagyanig.
Dagdag pa niya, mas ligtas pa nga minsan ang mga mataas na gusali kumpara sa mga low-rise structures, lalo na kung ang mga mababang gusali ay hindi regular na nasusuri ng mga building officials.
Maaari din umanong humiling ang publiko sa building administrator o developer ng mga dokumentong nagpapatunay na dumaan sa kinakailangang inspeksiyon ang kanilang tinitirhang gusali.
Kung maaalala, batay sa pag-aaral ng PHIVOLCS, MMDA, at Japan International Cooperation Agency (JICA), tinatayang 40% ng mga residential buildings sa Metro Manila ang maaaring maapektuhan o gumuho kung tatama ang tinaguriang “The Big One”, o ang magnitude 7.2 na lindol.
Gayunpaman, sinabi ng PHIVOLCS na i-update ang nasabing datos sa susunod na taon, bilang bahagi ng patuloy na paghahanda ng bansa sa malalakas na lindol.
