Inihirit ni House Assistant Majority Leader at Zambales Representative Jay Khonghun na isama sa nagpapatuloy na imbestigasyon ng Committee on Good Government and Public Accountability ang findings ng Commission on Audit ukol sa umano'y unsettled financial transactions ng Department of Education.
Batay kasi sa 2023 annual audit report ng COA ay nabigo ang DepEd na maasikaso ang 12.3 billion pesos na halaga ng notices of suspension, disallowance and charge.
Iginiit ni Khonghun na maaaring mapalakas ang impeachment case laban kay Vice President Sara Duterte sa harap ng paghahanda ng 11-man prosecution team ng Kamara sa paglilitis ng Senado.
Maaari rin aniyang hilingin ng House prosecutors sa Impeachment Court na ipa-subpoena ang financial records ng pangalawang pangulo upang matukoy kung may koneksyon ito sa umano'y maanomlayang transaksyon sa OVP at DepEd.
Dagdag naman ni Representative Rodge Gutierrez, kung nakahanay ang isyu ng financial transactions sa DepEd sa mga alegasyon laban kay VP Sara sa impeachment complaint ay tiyak na hindi ito isasantabi ng prosecution.
Bagama't isa sa grounds for impeachment ay ang graft and corruption, dedepende umano ito sa appreciation ng ebidensya.
