Umaasa ang mga kaanak ni Kian delos Santos na hindi matatapos sa kaso ng naturang binatilyo ang pagpapanagot sa mga sangkot sa mga patayan noong nagdaang administrasyon.
Kasunod ito ng pagpapatibay ng Supreme Court sa guilty verdict laban sa tatlong mga pulis na sangkot sa pagpatay kay Kian.
Sa panayam ng Brigada NewsFM Manila sa tiyuhin ni Kian na si Randy, sinabi nitong sa ngayon ay wine-welcome naman daw nila ang naging desisyon ng Korte Suprema.
Sa kabila nito, 'di pa rin daw nila tuluyan itong maituring na tagumpay dahil mayroon pang mga legal na remedyo na maaaring gawin ang kampo ng mga hinatulang pulis.
Patuloy naman ang kanilang panawagan sa pagbuo ng isang truth comission.
Sa ganitong paraan, hindi lang ang pagkamatay ni Kian ang maiimbestigahan, kundi gayon din ang iba pang mga pang-aabuso sa kampanya laban sa iligal na droga ng nagdaang administrasyon.
