LEGAZPI CITY – Umaasa ang lokal na pamahalaan ng Legazpi City na hindi na maulit pa ang nangyari noong nakaraang linggo sa Ibalong Festival 2024 Grand Parade na halos naging parada na ng mga ambulansya ang eksena.
Ang masaya sanang opening ceremony noong Biyernes ay nauwi sa pag-aalala dahil sa dami ng mga estudyanteng kalahok na inagapan at itinakbo sa ospital dahil hindi na kinaya ang pagod at init ng panahon.
Sa panayam ng Brigada News FM Legazpi kay Incident Management Team Commander Bong Samar, sinabi niya na nagkaroon na sila ng pag-uusap kahapon at napagkasunduan na iklian ang distansya ng street presentation.
Kung dati ay mula ito sa City Hall, iiklian na ito’t gagawin na sa may Vel Amor Subdivision ang starting point.
Dagdag pa ni Samar, lahat ng mga barangay na daraanan ng parada, mayroong itatalagang medical at water station na mayroong staging area na may nakatalagang lima-10 tanod, apat na barangay health workers at dalawang nurse.
Ito’y upang pag mayroong pagkakataon na mayroong nahimatay, hindi kaagad ito isusugod sa ospital, kundi i-aasses muna sila sa staging area.
Samantala, tiwala naman umano sila malalas ang resistensya ng mga contingents sa street presentation dahil sanay na rin naman sila sa ganitong mga aktibidad.
Ang kanila umanong babantayan ay ang mga manonood sa gilid ng kalsada na mayroong mga senior citizens.
