Tinawag na "kalokohan" ng dating kongresista na si Mike Defensor ang planong pagpapa-subpoena sa kanya ng National Bureau of Investigation kaugnay ng alegasyon na nag-alok umano siya ng tig-P5 milyong suhol sa 18 dating miyembro ng Philippine Marines upang magsalita at tumestigo sa isinasagawang imbestigasyon sa flood control scandal.
Ayon kay Defensor, katulad umano ito ng naging kaso ni Orly Goteza, na aniya'y pinapirma rin umano ng NBI na inalukan siya ng pera kapalit ng kanyang testimonya.
Giit ni Defensor, isa lamang umano itong hakbang ng NBI upang sirain ang kredibilidad ng mga dating sundalo.
Sa ngayon, sinabi ni Defensor na wala pa siyang natatanggap na subpoena mula sa NBI.
Gayunman, handa naman umano siyang humarap sa ahensya upang sagutin ang mga paratang laban sa kanya.
