Patuloy na umaangat ang OPM sa international scene matapos ma-nominate ang awiting “Multo” ng bandang Cup of Joe para sa Best Song Asia sa prestigious na Music Awards Japan 2026.
Ayon sa organizer na Japan Culture and Entertainment Industry Promotion Association, kabilang ang “Multo” sa piling mga kantang kinilala dahil sa malakas nitong cultural impact at artistic excellence sa Asya.
Makakatapat ng Cup of Joe ang ilang kilalang international tracks tulad ng Golden ng HUNTR/X, Drowning ni WOODZ, Dash ng PLAVE, at Tabola Bale ng Indonesian group na Silet Open Up.
Itinatag noong 2025, layunin ng Music Awards Japan na maging pandaigdigang plataporma para sa iba’t ibang tunog at talento mula sa Asia.
Ayon sa CEIPA, nais nilang mas mapalawak pa ang pagkilala sa mga artist mula sa Pilipinas, South Korea, Thailand, Indonesia, Vietnam, at iba pang bansa sa rehiyon.
Nakatakdang idaos ang awards ceremony sa Hunyo 13, 2026 sa Toyota Arena Tokyo SGC Hall Ariake.
Para sa maraming fans, malaking hakbang ito hindi lamang para sa Cup of Joe kundi para rin sa patuloy na paglawak ng impluwensya ng OPM sa global music industry.
