Nilinaw ng MVP Sports Foundation (MVPSF) na hindi nito pag-aari at hindi nito mina-manage ang Ateneo de Manila University men's basketball team.
Ito ay matapos sabihin ng Criminal Investigation and Detection Group (CIDG) na isa-subpoena ang Smart Communications officials kaugnay ng imbestigasyon sa pagkamatay ng dalawang student-athletes.
Sa isang pahayag, sinabi ni MVPSF president Alfredo Panlilio na ang tungkulin ng foundation ay limitado lang sa pagbibigay ng pondo para sa Ateneo Blue Eagles.
Hindi na umano ito umaabot pa sa pamamalakad sa programa ng team, athletes, coaching, recruitment, o player development.
Maliban diyan, nilinaw din ni Panlilio na si Epok Quimpo, isang empleyado ng Smart Communications, ay nagsilbi bilang team manager ng Ateneo men's basketball team dahil sa kanyang personal capacity bilang Ateneo alumnus at dating manlalaro.
Sa huli, sinabi ng MVPSF na tumitindig ito kasama ang mga Pilipino hindi lamang para sa pagluluksa sa pagkasawi ng mga atletang sina Rene Baterbonia at Divine Adili, kung 'di sa pagsusulong ng katotohanan sa likod ng nangyaring trahedya sa mga ito.
Mababatid na nagsumite na ng resignation sina Quimpo at ang head coach na si Tab Baldwin sa gitna ng isyu.
