Ipigmawot kuta kan sarong barangay kapitan sa syudad kan Legazpi na dae na isabay sa listahan kan mabebenepisyaran kan libreng 10 kilos na bagas an mga myembros kan Pantawid Pamilya Pilipino Program asin Walang Gutom Program.
Alagad, dae nagtao nin record an DSWD huli ta pagbalgar ini sa Privacy Act.
Sinabi kaya ni Barangay Kapitan Ronaldo Mina, tyansa kunta ini kan ibang mga nasa vulnerable sectors na makaresebi kan ayuda.
Mientras tanto, aminado man an opisyal na naging padipisilan an pagpili kan nasa 300 na mabebenepisyaran kan rice subsidy urog naman na nasa labi tres mil an saindang residente.
Huli kaini, minakarhay kan konseho kan barangay na magkuha nin tig-50 na residente sa anum na purok.
