NAGA CITY —Huwag pabayaan, isilong ang mga inputs at maging ang mga makinarya, habang ang mga pwede nang anihin ay mas mabuting anihin na. Iyan ngayon ang paalala ng Naga City Agriculture Office sa mga magsasaka kontra sa banta ng bagyong Kristine sa mga palayan.
Ipinahahanda na rin ni CAgO Acting Head Ernesto Asence III, ang mga dokumento sa crop insurance kung nakapag-file man ng aplikasyon sa Philippine Crop Insurance Corporation.
Binigyang diin rin ni Asence na huwag nang hintayin pang lumakas ang ulan at hanging dala ng bagyo bago gumawa ng aksyon.
Samantala, sa pinakahuling tala ng opisina bumaba ang average yield ng naaning palay dahil sa epekto ng mga nakaraang sama ng panahon, mula sa dapat na 4.1 metric tons per hectare, nasa 2.97 metric tons ang naani.
Pasalamat naman ngayon ang ilang magsasaka na hindi pa sila nakakapagtanim, at hindi pa gaanong maapektuhan sakali mang lumakas ang epekto ng bagyong Kristine.
