Inilabas ng National Mapping and Resource Information Authority (NAMRIA) ang opisyal na administrative map ng Pilipinas na malinaw na ipinapakita ang West Philippine Sea (WPS) bilang bahagi ng maritime jurisdiction ng bansa.
Kasunod ito ng patuloy na pagbatikos ni Senador Rodante Marcoleta at pagkuwestyon ng umano'y kawalan ng mapa ng WPS, at ang kawalang ng metes and bounds at coordinates.
Binigyang-linaw ng ahensya na simula pa noong 2012 ay pormal nang ginagamit ng Pilipinas ang pangalan West Philippine Sea sa mga government publications alinsunod sa umiiral na patakaran, at ito ay inilalagay nang pareho sa lahat ng opisyal na mapa at charts nito.
Ayon sa NAMRIA, ang mga opisyal na mapa at nautical charts ay ginagamit upang ipagtanggol at tiyakin ang maritime jurisdiction ng bansa sa WPS at nagsisilbi rin bilang teknikal at praktikal na sanggunian para sa mga mandaragat, planners, researchers, at iba pang institusyon lokal man o internasyonal.
Ayon sa ahensya, ang isang maikling listahan ng coordinates ay hindi sapat upang tumpak na mailarawan ang maritime limit ng exclusive economic zone (EEZ) ng Pilipinas.
Sa ilalim ng international law, ang EEZ ay umaabot hanggang 200 nautical miles mula sa archipelagic baselines ng bansa.
