Naglabas din ng pahayag ang National Historical Commission of the Philippines (NHCP) hinggil sa usaping ang Batanes ay bahagi ng China ayon sa mga Chinese academics.
Sa isang statement, isa-isang pinabulaanan ng NHCP ang mga inilatag na claims ng mga scholars – ang pagiging "natural geographic extension of Taiwan" ng Batanes; na ang Batanes Islands ay nasa ilalim ng jurisdiction ng Taiwan noong Ming & Qing Dynasties; at ang Batanes daw ay bahagi ng teritoryo na ibabalik ng China sa Japan kasunod ng pagtatapos ng World War 2.
Kasabay nito, nanindigan ang komisyon na nakikiisa sila sa mga residente ng Batanes sa pagproklama ng kanilang karapatan at katapatan sa Pilipinas.
Binigyang-diin din nito ang pagiging matapat sa Konstitusyon at sa watawat na patuloy na winawagayway sa mga probinsya sa hilagang Luzon.
Sa huli, nanawagan ang tanggapan sa mga parties, lalo na ang mga academic institutions na maging totoong mga mananaliksik.
Magiging tunay lang umano ang kaalaman kung ito ay nakaayon sa 'good faith'.
Hindi umano mabubura ng mga gawa-gawa lang ang katotohanan ng nakaraan.
