Hinamon ni National Bureau of Investigation (NBI) Director Melvin Matibag si dating congressman Mike Defensor na magsampa ng kaso laban sa kanyang asawang si Laguna 1st District Rep. Ann Matibag kung mayroon itong matibay na ebidensya kaugnay ng umano’y anomalya sa mga flood control project.
Ito ay matapos akusahan ni Defensor si Rep. Matibag na sangkot umano sa bilyong pisong katiwalian sa flood control projects sa San Pedro, Laguna.
Ayon kay Matibag, kung may ebidensya si Defensor, dapat niya itong dalhin sa korte at hindi lamang ilahad sa publiko.
Dagdag pa niya, kung naniniwala ang kampo ni Defensor na siya ay hina-harass ng NBI, maaari rin silang magsampa ng kaso laban sa kanya.
Ang pahayag ni Matibag ay kasunod ng planong pagsasampa ng NBI ng kasong qualified human trafficking laban kay Defensor at iba pang personalidad kaugnay ng sinalakay na KTV bar at hotel sa Pasig City.
Mariin namang itinatanggi ni Defensor ang mga akusasyon at iginiit na may bahid pulitika ang mga kasong inihahain laban sa kanya.
