Hinamon ni NBI Director Atty. Melvin Matibag si Senate President Alan Peter Cayetano na dumalo sa pagdinig ng Senate Blue Ribbon Committee sa Lunes kung nais siyang tanungin nang personal.
Ayon kay Matibag, nakatanggap na siya ng imbitasyon mula sa komiteng pinamumunuan ni Senador Erwin Tulfo, na kanyang kinikilalang lehitimong chairman ng Blue Ribbon Committee.
Aniya, bukas siyang sagutin ang lahat ng tanong ni Cayetano sa naturang pagdinig.
Ang pahayag ay kasunod ng hamon ni Cayetano na humarap si Matibag sa Senado at ilahad ang ebidensiya kaugnay ng impormasyong natanggap ng NBI na umano'y binayaran ng tig-P5 milyon ang 18 dating Marines upang tumestigo laban kay dating congressman Elizaldy Co.
Ngunit iginiit ni Matibag na hindi niya kinikilala ang komiteng nagsagawa ng pagdinig noong Huwebes sa pangunguna ng kampo ni Cayetano.
Ayon sa NBI chief, hindi sapat ang isang verbal invitation para sa isang opisyal na pagdinig at kailangan itong manggaling sa kinikilala niyang lehitimong Blue Ribbon Committee.
Dagdag pa niya, kung nais talaga siyang usisain ni Cayetano, maaari itong dumalo sa pagdinig sa Lunes kung saan siya nakatakdang humarap.
