Inaresto ng National Bureau of Investigation (NBI) ang isang indibidwal na umano'y gumagawa at nagbebenta ng pekeng birth certificate sa Quezon City.
Ayon sa NBI, ikinasa ng Counter Terrorism Division ang entrapment operation matapos makatanggap ng impormasyon na nag-aalok ang suspek ng pekeng birth certificate kapalit ng bayad.
Lumabas sa imbestigasyon na gumagamit umano ang suspek ng mga papel, tinta, at QR code na kahawig ng ginagamit ng Philippine Statistics Authority.
Nakipagtransaksyon ang undercover agent sa suspek at umorder ng dalawang pekeng birth certificate na nagkakahalaga ng P5,000 bawat isa. Nagpadala rin ng P1,000 na down payment sa GCash account ng suspek.
Noong July 15, isinagawa ng NBI ang entrapment operation sa Quezon City.
Naaresto ang suspek matapos ibigay ang dalawang pekeng birth certificate at tanggapin ang natitirang bayad na markadong pera.
Nahaharap ang suspek sa kasong Falsification of Public Document sa ilalim ng Revised Penal Code.
