Feeling sorry ngayon si Diwata, o Deo Balbuena sa tunay na buhay, kasunod ng nangyaring pamba-bash sa kanya matapos magsuot ng tribal outfit sa ginanap na Grand Float Parade in Panagbenga (Baguio Flower Festival) at sa Strawberry Farm sa La Trinidad.
Sa isang Facebook post, humingi ng paumanhin si Diwata sa mga Indigenous Cultural Communities (ICC) ng Cordillera, sa mga taga-Benguet, mga taga-La Trinidad, taga-Baguio, at sa lahat umano ng nasaktan at kanyang na-offend.
Sa ilang larawan at videos kasi na uploaded sa social media, sinuot niya sa event ang naturang kasuotan habang gumagawa ng mga kilos na tila insensitive at disrespectful umano sa mga Indigenous Peoples, dahilan para ulanin siya ng pamba-bash.
Ang video ring ito ay kinondena ng National Commission on Indigenous Peoples (NCIP).
Sa kahiwalay pang video, makikita ang pagdila ni Diwata habang nilalaro ang sibat habang sinusubukan niyang pasayahin ang mga tao.
Ayon kay Diwata, ngayon niya lubos na naunawaan na ang kanyang kilos—ang pagsuot ng tradisyunal na kasuotan sa isang hindi angkop na paraan, at ang pagtawag dito bilang isang "costume"—ay isang malaking pagkakamali.
Hindi niya rin daw intensyon na bastusin o maliitin ang mayamang kultura ng mga nandoon.
Sa huli, sinabi nitong tinitiyak niyang makikinig siya sa payo at hatol ng ICC.
Sisikapin din umano niyang maunawaan at pag-aralan ang kultura ng mga komunidad na kanyang ipakikita sa mga contents.
