Pumalag sa pagtitipon ng Iglesia Ni Cristo (INC) ang Tindig Pilipinas – ang grupong binubuo ng mga sectoral organizations, civil society groups, church leaders, at political parties na tumulong sa pag-organisa ng mga ikinasang Trillion Peso March noong nakaraang taon.
Mababatid na isinagawa umano ang rally ng INC bilang suporta kay Senador Rodante Marcoleta sa gitna ng mga alegasyon sa kanyang campaign contributions.
Sa isang pahayag, sinabi ng Tindig Pilipinas na napakasimple lang ng tanong dito: bakit kailangan ng isang politiko ng libo-libong tao para ipagtanggol siya sa isang legal na imbestigasyon.
Ayon sa grupo, sa constitutional democracy, walang public official – ano man ang opisina nito o political influence – ang dapat mag-require ng pag-oorganisa ng libo-libong supporters para makaimpluwensya o magdulot ng pagdududa sa impartial na pagpapatupad ng batas.
Paliwanag pa nito, ang problema nila ay hindi ang karapatan sa mapayapang pagtitipon o kahit ang pagpili sa EDSA bilang venue.
Ang isyu raw kasi ay ang paggamit ng sama-samang political at institutional power para lang madepensahan ang isang tao sa pananagutan.
Bagaman lehitimong pamamamahayag umano ang public assmeblies at ang demokratikong pakikiisa, nagiging kabaha-bahala na ito kung gagamitin para protektahan ang isang politiko mula sa legal na pagsisiyasat.
Sa huli, nanawagan ang Tindig Pilipinas ng malalim, impartial, at independent na imbestigasyon sa lahat ng indibidwal na sangkot sa korapsyon at anomalya.
