Inihayag ni House Lead Prosecutor Gerville Luistro na maaaring tawaging hostile witnesses sa impeachment trial ni Vice President Sara Duterte ang mga opisyal mula sa Office of the Vice President at Department of Education.
Ayon kay Luistro, karamihan sa kanila ay nakita sa pagdinig ng House Committee on Good Government and Public Accountability noong 19th Congress.
Sentro umano ng alegasyon sa impeachment ang OVP at DepEd para sa mga alegasyon na may kaugnayan sa confidential funds.
Inaasahan na rin aniya ang pagtutol ng kampo ni Duterte kapag ipinrisinta na ang ebidensya sa article na may kinalaman sa unexplained wealth.
Punto ng kongresista, naramdaman na nila ito noon pang pagdinig ng House Committee on Justice.
Samantala, inaasahan din ng prosecution team na kokontrahin ng defense panel ang pagpapa-subpoena sa bank records at mga opisyal ng bangko.
Giit ni Luistro, patunay dito ang paghahain ng kasong kriminal ng kampo ni VP Sara noong Justice panel proceeding dahil sa paglabag umano sa confidentiality sa Anti-Money Laundering Council.
Sa panahon ding ito ay naghain umano sila ng petisyon ukol sa disclosure ng mga transaksyon sa Quezon City Regional Trial Court.
