Lahat ng mag-aaral sa bansa ang makikinabang sakaling maisabatas ang isang panukala na layong bigyan sila ng buwanang allowance.
Batay sa House Bill Number 27 na inihain ni Batangas Representative Leandro Leviste, isanlibong piso ang monthly allowance na tatanggapin ng mga estudyante sa lahat ng antas o mula Kindergarten hanggang kolehiyo, anuman ang kalagayang panlipunan.
Magsisilbi lamang na batayan ang pagsunod sa minimum attendance requirement na hindi bababa sa 80 percent kada buwan.
Sinabi ni Leviste na ang cash allowance ay dagdag na suporta bukod sa umiiral na scholarship grants at educational assistance programs.
Magagamit aniya ito sa pagkain, transportasyon, teknolohiya at school supplies na inaasahang magpapalakas sa attendance, graduation rates at academic performance ng mga mag-aaral.
Pero paglilinaw ng kongresista, hindi layunin ng panukala na bawasan ang pondo ng ibang educational programs ng gobyerno kundi palalawakin pa ito.
Iginiit ni Leviste na ang investment sa edukasyon ng susunod na henerasyon ay magdudulot ng mas mataas na kita para sa bansa.
Nakapaloob pa sa panukala na hinihimok ang gobyerno na mag-alok ng tax incentives at mangalap ng donasyon upang masuportahan ang pondo para sa national student allowance program.
