Naglabas na ang Department of Budget and Management o DBM ng kabuuang 362 milyong pondo para sa rehabilitasyon at muling pagtatayo ng mga pasilidad na napinsala ng magnitude 7.8 na lindol sa ilang bahagi ng Mindanao.
Ayon sa DBM, isinagawa ang paglalabas ng pondo alinsunod sa direktiba ni Pangulong Ferdinand Marcos Jr. upang mapabilis ang pagbangon ng mga komunidad na naapektuhan ng kalamidad.
Sinabi ni DBM Acting Secretary Kim Robert De Leon na initial pa lamang ito kung saan nagmula ang pondo sa Local Government Support Fund at direktang ipagkakaloob sa mga apektadong lokal na pamahalaan upang mapabilis ang recovery efforts at maibalik ang mga nasirang imprastraktura.
Bahagi ng paunang 362 milyon ang 100 million na inilabas noong June 9 para sa General Santos City.
Noong June 15 naman, nagpalabas din ang DBM ng 140 milyon para sa Sarangani na gagamitin sa pagsasaayos ng mga nasirang gusali, mga kalsada at iba pang imprastraktura.
Kabilang dito ang pagtatayo ng tulay sa Alabel at rehabilitasyon ng ospital sa bayan ng Glan.
Sa parehong araw, naglabas din ang DBM ng 122 milyon para sa South Cotabato bilang suporta sa rehabilitasyon ng kalsadang nag-uugnay sa Barangay Acmonan at Barangay Kablon sa bayan ng Tupi.
Ayon sa DBM, bahagi ang inilabas na pondo ng mas malawak na estratehiya ng pamahalaan para sa pagtugon at pagbangon ng mga lugar na naapektuhan ng mga sakuna.
Binigyang-diin ng ahensya na paunang tulong pa lamang ang 362 milyon at mayroon pang nakahandang pondo mula sa National Disaster Risk Reduction and Management Fund o NDRRMF para sa mga programa sa relief, rehabilitasyon at rekonstruksyon.
Maaari rin umanong humiling ng karagdagang pondo ang mga disaster response agencies para sa kanilang Quick Response Funds kapag umabot na sa itinakdang antas ang paggamit ng kanilang kasalukuyang pondo.
