Duda ang isang abogado sa kredibilidad ng mga alegasyong inilalabas ng mga nagpakilalang bagman ni Zaldy Co matapos umanong magbago-bago ang kanilang mga salaysay at mga personalidad na idinadawit sa isyu.
Sa panayam ng Brigada NewsFM Manila kay Public Interest Lawyer Atty. Dino de Leon, sinabi nitong kung dati, ang tawag niya rito ay '18 Sinungalings', ngayon, ang tawag na raw niya rito ay 'Dagdag-Bawas Gang'.
Aniya, kapansin-pansin ang pagdaragdag at pagbabawas ng mga detalye at pangalan sa mga pahayag ng mga nag-aakusa, dahilan upang kuwestiyunin ang pagiging kapani-paniwala ng kanilang mga paratang.
Ayon kay De Leon, tila naka-angkla sa mga kasalukuyang kaganapang pulitikal ang mga pagbabagong ginagawa sa mga alegasyon, bagay na aniya'y nagpapalakas sa hinalang may layunin lamang itong guluhin ang publiko.
Pinuna rin niya ang isinampang joint affidavit ng 18 katao, na aniya'y nakapagtataka kung paanong lahat ng lumagda ay sabay-sabay nakasaksi sa bawat detalyeng nakapaloob sa salaysay.
Dahil dito, naniniwala si De Leon na mahihirapang tumayo sa korte ang mga naturang alegasyon kung hindi ito susuportahan ng malinaw, pare-pareho, at matibay na ebidensiya.
Kasabay nito, hinikayat niya ang publiko na maging mapanuri at suriing mabuti ang mga impormasyong lumalabas kaugnay ng isyu.
