Naniniwala ang eight-division world champion na si Manny "Pacman" Pacquiao na hindi pa huli ang lahat para sa kaniyang inaabangang rematch laban kay US boxing legend Floyd Mayweather Jr. ngayong Setyembre 2026.
Sa kaniyang pahayag, sinagot ng Pambansang Kamao ang mga kritisismo na "masyadong huli na" ang paghaharap ng dalawang retiradong kampeon matapos ang mahigit isang dekada mula nang una silang magtuos noong Mayo2, 2015.
Ayon kay Pacquiao, nananatiling nasa maayos na pisikal na kondisyon silang dalawa ni Mayweather dahil hindi sila nagpabaya sa kanilang pangangatawan kahit pa sila ay retirado na sa professional boxing.
Ibinahagi rin ng boksingero na nagsimula na siyang sumailalim sa mga light training ilang buwan bago ang nakatakdang laban upang matiyak na nakahanda ang kaniyang stamina at bilis para sa nasabing paghaharap.
Bukod sa rematch kay Mayweather, kinumpirma rin ni Pacquiao na isinasapinal na ang isang exhibition fight laban kay retired junior welterweight champion Ruslan Provodnikov ng Russia.
Ang labang ito ay magsisilbing bahagi ng kaniyang paghahanda para sa mas malaking kaganapan sa Setyembre, habang patuloy na pinatutunayan ng kampo ni Pacquiao na nananatili ang kaniyang hilig at lakas sa loob ng ring.
