Naghain si Akbayan Party-list Representative Chel Diokno ng resolusyon upang paimbestigahan kung sapat ang pondo ng gobyerno para sa Brigada Eskwela at iba pang aktibidad sa mga paaralan bilang paghahanda sa pasukan.
Sa gitna ito ng mga ulat na patuloy umanong gumagastos ang mga public school teacher mula sa sariling bulsa para maihanda ang mga silid-aralan sa pagbubukas ng klase.
Batay sa House Resolution 1102, nais ni Diokno na imbestigahan ng House Committee on Basic Education and Culture ang sinasabing paglalabas ng pera ng mga guro para sa pagkukumpuni ng mga classroom, facility maintenance, sanitation improvements at iba pang preparasyon.
Susuriin din ang posibleng administrative, budgetary at structural deficiencies kaya napipilitan ang teachers na gastusan ang school maintenance at classroom improvements.
Binigyang-diin nito na iminamandato ng 1987 Constitution ang sapat na suporta sa edukasyon kabilang ang pagprotekta sa mga guro mula sa pasaning pinansyal na nakakaapekto sa kanilang kapakanan at professional responsibilities.
Sa kabila aniya ng umiiral na DepEd memoranda, may mga ulat pa rin ng paggamit ng personal na pondo ng teachers.
Ipinunto rin ng kongresista na bagama’t maraming guro ang boluntaryong nag-aambag ng resources dahil sa commitment sa mga mag-aaral, mismong si DepEd Secretary Sonny Angara na ang nagsabing hindi dapat required ang mga ito na gumastos mula sa sariling bulsa.
Kaya naman naniniwala si Diokno na mahalaga ang imbestigasyon ng Kamara para matukoy kung sapat ang umiiral na appropriations, funding mechanisms at accountability systems para masigurong handa ang public schools sa pagbubukas ng klase nang hindi inoobliga ang mga teacher na sagutin ang gastos.
