Hindi mababago ng objections ni Senator-Judge Alan Peter Cayetano ang naunang ruling ng Senate Impeachment Court na maglabas ng subpoena laban sa tax at bank records ni Vice President Sara Duterte.
Ito ang pananaw ng House prosecution panel matapos magpahayag ang ilang senador na magsusumite ng dissenting o separate opinion hinggil sa isyu kabilang na si Cayetano.
Sa pulong balitaan, sinabi ni House prosecutor Chel Diokno na hindi na mababaligtad ang desisyon ng impeachment court bagama’t sa ilalim ng Rules of Impeachment ay may karapatan ang isang senator-judge na maghain kung hindi ito sumasang-ayon sa pagpapasya.
Pag-aaralan aniya ng prosekusyon ang reasoning o dahilan ng senator-judge sa sandaling naisumite na ito.
Ipinaliwanag din ni House prosecution legal spokesperson Atty. Benjamin Tolosa Jr. na sa ilalim ng rules, magsisilbing court ruling ang pasya ng presiding officer maliban na lang kung mayroong senator-judge na humiling ng pormal na botohan.
Mababatid na iginawad ng impeachment court ang request for subpoenas sakop ang specified peso-denominated bank records, AMLC documents at BIR records kaugnay sa Article II o ang unexplained wealth at discrepancies sa declared assets at financial activity.
Hindi naman kasama ang foreign-currency deposits pati na ang dalawang entities na sinasabing walang kaugnayan.
