Batid daw ni Senador Robin Padilla na mahaba-habang usapin ang pagtalakay sa pagtatakda ng nararapat na edad para sa mga posibleng humarap sa criminal responsibility o legal na pananagot sa krimen lalo na sa mga kabataan.
Pero paglilinaw niya, batid niyang dapat maging mas 'restorative' ang approach ng gobyerno sa pagpapanagot sa mga kabataan imbis na 'punitive'.
Ngunit bilang mas expose na sa technological advancement ang mga kabataan ngayon, naniniwala ang senador na mas napapabilis ang kanilang matured discernment o pagkakaroon ng sapat na kakayahang makaunawa ng tama at mali at di kalauna'y pagsasagawa ng risk-taking behaviors.
Kaugnay nito, naghain ng panukalang batas ang senador na naglalayong amyendahan ang kasalukuyang Juvenile Justice and Welfare Act of 2006 para mapanatili na magiging makatarungan ang batas.
Sa ilalim nito, ang sinumang 10 years old hanggang 17 years old ay hindi exempted sa anumang criminal liability kung ito ay nakapagsagawa ng mga karumaldumal na krimen tulad ng parricide, murder at infanticide.
Kung ang bata naman ay repeat offender at nasa 15 years old hanggang 18 years old at non-heinous naman ang nagawa, kailangan nitong sumailalim sa community based intervention program.
Samantala, ipapatupad naman ang automatic suspension of sentence sa mga nasa 18 years old pababa ng gumawa ng mga non-heinous crime.
