Isinusulong ni House Deputy Majority Leader Mica Gonzales ang resolusyon na layong imungkahi ang pagtatalaga ng mga barangay tanod sa pampublikong paaralan para dagdagan ang seguridad ng mga mag-aaral at guro.
Ito’y matapos ang magkakasunod na ulat ng pananaksak at pamamaril sa ilang paaralan ngayong buwan.
Batay sa House Resolution Number 1145, inirekomenda ni Gonzales na magpakalat ng barangay tanod ang Department of the Interior and Local Government katuwang ang local government units tuwing school hours upang solusyunan ang kakulangan ng security guards sa mga campus.
Pangungunahan ng Philippine National Police (PNP) ang security at first-response trainings sa mga tanod.
Paiigtingin din ang screening protocols o inspeksyon sa gates ng mga paaralan sa pakikipagtulungan ng Department of Education at mga barangay upang maiwasan o maharang ang pagpasok ng mga armas sa loob ng mga campus.
Ipinaliwanag ni Gonzales na mahalaga ang mga pangmatagalang reporma ngunit kailangang-kailangan ngayon ng mga bata ang proteksyon.
Kailangan aniya ng malakas at pinag-isang depensa sa pamamagitan ng pagsasanib-pwersa ng mga ahensya at mga lokal na komunidad upang mapigilan ang mga karahasan sa eskuwelahan.
