Nagpaabot ng pakikisimpatya si House Speaker Faustino “Bojie” Dy III sa mga biktima ng malagim na pamamaril sa San Jose National High School sa Tacloban City.
Sa isang statement, sinabi ni Dy na binibigyang-diin ng nangyaring trahedya ang pangangailangan na palakasin ang mga hakbang para maiwasan ang karahasan at panatilihing ligtas ang mga paaralan.
Lubhang nakababahala aniya na may mga batang binawian ng buhay at naapektuhan ang kaligtasan sa mga eskuwelahan gayong dapat ay lugar ito para matuto, may seguridad at oportunidad para sa bawat kabataang Pilipino.
Suportado rin ni Speaker Dy ang pagkakasa ng malalim at patas na imbestigasyon sa insidente para matiyak ang pananagutan at matukoy ang mga nararapat na hakbang sa hinaharap.
Giit pa ng pinuno ng Kamara, hindi sapat na alamin kung sino ang may kasalanan, bagkus ay kailangang suriin kung anu-anong senyales ang hindi napansin at paano mapalalakas ang mga sistemang poprotekta sa mga kabataan bago pa tuluyang maligaw sa landas ng karahasan.
Samantala, pinag-aaralan ni Bagong Henerasyon Party-list Representative Robert Nazal ang paghahain ng panukalang batas na magtatatag ng komprehensibong School Safety and Violence Prevention Program na magpapalakas sa seguridad sa campus at pagbubutihin ang anti-bullying at behavioral intervention systems.
Nais din ni Nazal na palawakin ang access sa counseling at mental health support, oobligahin ang regular na school safety audits at titiyakin na mayroong warning signs ng potential violence.
Punto nito ang nangyari sa Tacloban ay paalala na hindi ligtas mula sa karahasan ang educational institutions at hindi na dapat maisip ng gobyerno sa bandang huli ang school safety and violence prevention.
Paliwanag pa ni Nazal, wala pang komprehensibong national framework ang bansa na nagtatakda ng minimum school safety standards, violence prevention programs, threat assessment protocols at coordinated intervention mechanisms kasama ang paaralan, mga magulang, LGU, law enforcement agencies, guidance counselors at mental health professionals.
