Inulan ng batikos ang dating broadcaster na si Ramon Tulfo mula sa iba't ibang grupo ng mga doktor matapos niyang i-post sa social media ang reklamo laban sa isang surgeon sa Philippine Heart Center.
Tinuligsa si Tulfo ng Philippine Medical Association, Philippine College of Surgeons, Patacsi, Philippine Wound Care Society, at Philippine College of Physicians dahil sa umano’y maling pagbibintang sa doktor na naningil ng ₱85,000 para sa operasyon sa binti ng isang pasyente.
Paliwanag ng mga grupo, makatarungan at mas mababa pa sa normal ang singil ng surgeon kumpara sa hirap at tagal ng gamutan.
Higit 20 araw daw na inalagaan ang pasyente at pumayag pa ang doktor na bayaran ito gamit ang guarantee letter.
Diin pa nila, dapat sa tamang lugar idinadaan ang reklamo at hindi sa social media na maaaring makasira sa reputasyon ng mga manggagamot.
Sa kabila nito, nanindigan si Tulfo sa kanyang ireklamo at iginiit na hindi siya magso-sorry.
Aniya, “If I offended you, that is your problem, not mine."
