Ipinauubaya na ng Malacañang sa pamunuan ng Senado ang pagpapasya ukol sa panawagang suspensyon sa mga mambabatas na nahaharap sa kasong plunder.
Kasunod ito ng mungkahi ng ilang abogado na dapat awtomatikong suspendihin ang mga akusadong senador at pigilin ang budget ng kanilang mga opisina.
Kabilang sa mga nais ipatigil ng ilang grupo ay ang operasyon ng tanggapan pati na ang pagpapasahod sa mga staff ng mga makakasuhang mambabatas.
Ayon kay Palace Press Officer Claire Castro nasa kamay na ng Senado kung anong mga panuntunan ang kanilang ipatutupad ukol sa usapin.
Binigyang-diin ng Palasyo na hindi hahadlangan o pakikialaman ng Ehekutibo ang anumang hakbang o magiging desisyon ng mataas na kapulungan.
Aminado naman ang opisyal na magiging unfair nga o hindi patas kung patuloy na papaswelduhan ang mga empleyado kung wala naman silang ginagawang trabaho.
Sa ilalim ng Anti-Plunder Law, mandatory ang preventive suspension ng isang incumbent public official sa sandaling maisampa sa korte ang isang valid information kaugnay ng kasong plunder.
Inaasahan ng administrasyon na ang ganitong mabigat na parusa ang magsisilbing babala sa mga empleyado para pigilan ang kanilang pinagsisilbihang govt official sa korapsyon.
