Pinayuhan ng Malacañang si Vice President Sara Duterte na sa impeachment court na lamang ilahad ang kanyang panig kaugnay ng impeachment case laban sa kanya.
Ito'y matapos maglabas ng pahayag ang Bise Presidente bilang tugon sa sinabi ni Pangulong Ferdinand Marcos Jr. na mas mainam kung personal na humarap si VP Duterte sa impeachment court upang maipaliwanag ang kanyang panig.
Sa kanyang statement, iginiit ni Duterte na walang halaga ang opinyon ng Pangulo sa impeachment proceedings dahil ang dapat umanong umiral ay ang Konstitusyon at due process.
Ayon kay Palace Press Officer Claire Castro, dapat umanong isabuhay ng Bise Presidente ang sarili nitong panawagan at sa impeachment court na lamang magpaliwanag.
Dagdag pa ng opisyal, hindi makatutulong ang mga pahayag nito laban sa Pangulo para linisin ang kanyang pangalan kung sa labas lamang ng impeachment court ito inilalahad.
