Isinusulong ng pamahalaan ang mas pinaigting na legal at policy framework upang tugunan ang disinformation at mapatatag ang pambansang seguridad, kasabay ng paggunita sa ika-10 anibersaryo ng arbitral ruling sa West Philippine Sea.
Ayon kay DOJ Senior State Counsel Atty. Fretti Ganchoon, kasalukuyang ina-update ng pamahalaan ang National Marine Policy upang mas maging malinaw, napapanahon, at pangmatagalan ang direksyon ng bansa sa usaping pandagat.
Mahalaga aniya ang pagkakaisa ng bansa sa ganitong usapin dahil nakaaapekto ito sa pambansang seguridad.
Pero aminado siyang hinahamon ang pagkakaisang ito dahil sa patuloy na pagkalat ng maling impormasyon, na itinuturing na bahagi ng tinatawag na “information warfare.”
Dahil dito, iginiit ng DOJ ang kahalagahan ng tamang pagbabalita at pag-unawa ng publiko sa isyu ng West Philippine Sea upang hindi malinlang ng maling impormasyon.
Umaasa rin ang ahensya na sa pamamagitan ng mga ganitong talakayan, mas mapapalakas ang kakayahan ng bansa na labanan ang disinformation at mapanatili ang tamang kaalaman ng publiko.
