Iniulat ni Department of Social Welfare and Development (DSWD) Assistant Secretary at spokesperson Irene Dumlao na kabuoang 1,827,827 na mga benepisyaryong public utility vehicle (PUV) drivers at delivery riders ang nakatanggap ng P5,000 na cash aid mula March 17 hanggang June 30.
Ito ay bilang tugon sa sumisirit na presyo ng produktong petrolyo.
Ayon sa DSWD, nakapagbigay ito ng P9.139B sa ilalim ng Assistance to Individuals in Crisis Situation (AICS) program.
Pinakamalaking bilang ng mga benepisyaryo ay ang mga tricycle drivers na umabot ng 1.2M.
Sinusundan 'yan ng higit 314,000 na mga delivery riders, halos 120,000 na mga jeepney drivers, 104,000 na mga taxi drivers, at halos 90,000 na mga transport network vehicle service (TNVS) drivers.
Una nang sinabi ng ahensya na nasa 2.4M na mga PUV drivers at riders ang magiging qualified para sa tulong batay sa listahan na inendorso ng local government units, transport network companies, Land Transportation Franchising and Regulatory Board, Department of Information and Communications Technology, at Private Express and Messengerial Delivery Service Sector.
Paliwanag ni Dumlao, ang gap sa projected at actual na bilang ng mga benepisyaryo ay maaaring dahil ang ilan sa kanila ay hindi na nagtatrabaho bilang mga PUV drivers o maaaring wala na sa bansa.
