May naka-schedule na working visit si Pangulong Ferdinand Marcos Jr. sa New York, USA mula March 8-11 upang dumalo sa mga high-level meeting ng United Nations.
Ayon kay Palace Press Officer Claire Castro, kabilang sa magiging agenda ng Pangulo ang pagdalo sa opening ng 70th session ng Commission on the Status of Women, na tumatalakay sa mga isyu ng gender equality at women empowerment.
Taong 2024 nang muling nahalal ang Pilipinas bilang myembro ng Commission on the Status of Women para sa taong 2025 hanggang 2029, matapos ang naging pamumuno ng bansa sa ika-68 session nito.
Magbibigay rin ng talumpati ang Presidente sa isang special session ng UN General Assembly bilang bahagi ng aktibong pakikilahok ng Pilipinas.
Makikipagpulong din ang Pangulo sa ilang opisyal ng United Nations.
