Mas uunahin daw ni Pangulong Ferdinand Marcos Jr. ang kanyang mga tungkulin bilang Punong Ehekutibo kesa personal na subaybayan ang impeachment trial ni Vice President Sara Duterte.
Ito ang sinabi ni Palace Press Officer Claire Castro nang tanungin kung imo-monitor ng Pangulo ang pagsisimula ng impeachment trial sa Senado.
Ayon kay Castro, hindi kinakailangang bantayan ng Pangulo ang bawat pagdinig dahil maipararating naman sa kanya ang mahahalagang kaganapan habang ginagampanan nya ang kanyang mga tungkulin.
Anya, mas marami pang mahahalagang bagay na dapat pagtuunan ng Pangulo kaysa umupo lamang upang panoorin ang impeachment trial.
Samantala, muling iginiit ng Malacañang ang nauna nang pahayag ni Pangulong Marcos na kung may mga akusasyong kailangang sagutin, mas mabuting humarap ang Bise Presidente sa impeachment trial upang maipaliwanag ang kanyang panig at linisin ang kanyang pangalan.
