Inilunsad ni Pangulong Ferdinand Marcos Jr. ang isang website na naglalaman ng kumpletong impormasyon hinggil sa mga flood control project sa bansa.
Sa pamamagitan ng www.sumbongsapangulo.ph, maaaring makita ng publiko ang listahan ng mga proyekto, lokasyon, pangalan ng contractor, halaga ng kontrata, completion date, at may opsyon din para mag-report.
Sa report option, maaaring direktang magsumbong sa Pangulo hinggil sa tunay na estado ng proyekto, kalakip ang larawan o video bilang ebidensya.
Kasabay ng paglulunsad ng website, ipinakita rin ng Pangulo ang mga datos mula sa paunang imbestigasyon ng Palasyo.
Batay sa datos ng Palasyo, mula July 2022 hanggang May 2025, may kabuuang 9,855 projects na nagkakahalaga ng mahigit 545 bilyon.
Nasa 2,409 contracting entities kabilang ang mga solo contractor at may co-contracting agreements ang lumahok sa implementasyon ng mga proyekto.
Sa kabuuang pondo na 545 billion, 100 bilyon o katumbas ng 20% ang napunta lamang sa 15 contractor.
Sa naturang listahan, limang kumpanya ang may flood control projects sa halos lahat ng rehiyon sa bansa: Legacy Construction Corporation, Alpha & Omega General Contractor & Development Corporation, St. Timothy Construction Corporation, EGB Construction Corporation, at Road Edge Trading & Development Services.
Nilinaw ng Pangulo na hindi ito akusasyon laban sa mga partikular na kontraktor, kundi pagbibigay ng malinaw na impormasyon kung sinu-sino ang mga pangunahing nasa likod ng mga proyekto.
Hinikayat rin nya ang publiko na bisitahin ang website, suriin ang mga detalye, at magsumite ng ulat kung kinakailangan.
Binigyang-diin ng Pangulo na mas magiging epektibo ang imbestigasyon kung may aktibong partisipasyon mula sa taumbayan.
#
