Nakarating na si Pangulong Bongbong Marcos sa Vancouver para sa apat na araw na official visit nito.
Lumapag ang kaniyang flight sa Vancouver International Airport, 4:46 p.m. local time, 'o 7:46 a.m. oras sa Pilipinas.
Sa kanyang departure speech kagabi, sinabi ng Punong Ehekutibo na layunin ng kanyang pagbisita na higit pang palakasin ang ugnayan ng Pilipinas at Canada, partikular sa kalakalan, pamumuhunan, depensa at iba pang strategic sectors.
Bago tuluyang umalis ng bansa, nagpahayag ng tiwala ang Pangulo na mananatiling mapayapa ang isinagawang rally ng Iglesia ni Cristo (INC) sa EDSA dahil sa maayos na record ng organisasyon sa mga nakaraang pagtitipon.
Gayunpaman, sinabi nyang ikinababahala pa rin ng pamahalaan ang natanggap na impormasyon na may mga grupong posibleng mag-infiltrate at mag-agitate sa gitna ng kilos-protesta.
"Malakas ang loob ko kasi sa buong kasaysayan ang Iglesia, pag nagra-rally, kahit napakarami, hindi sila nanggugulo. Ang problema lang namin, may impormasyon na may mga mag-i-infiltrate, mag-a-agitate. Ang pinakaimportante sa amin, walang masaktan." ayon kay Marcos.
Nagpasalamat din ang Pangulo sa mga awtoridad at sa lahat ng mga tumulong upang mapanatiling ligtas at mapayapa ang isinagawang rally.
Binigyang-diin din nya na ang pangunahing layunin ng pamahalaan ay matiyak na walang masasaktan, maging mula sa mga myembro ng Iglesia ni Cristo o iba pang maaaring pumunta sa kilos-protesta.
