Pinasalamatan ni Pangulong Ferdinand Marcos Jr. ang Germany sa patuloy nitong suporta sa pagsusulong ng rule of law sa South China Sea.
Sa joint press conference sa Malacañang kasunod ng bilateral meeting nila ni German President Frank-Walter Steinmeier, sinabi ng Pangulo na mahalagang katuwang ng Pilipinas ang Germany sa pagsusulong ng rules-based international order.
Partikular na pinasalamatan ni Pangulong Marcos ang Germany sa patuloy at hayagang pagsuporta nito sa mga hakbang ng Pilipinas upang itaguyod ang international law sa South China Sea, kabilang ang panawagan sa lahat ng panig na igalang ang 2016 Arbitral Award.
Bukod sa usapin sa West Philippine Sea, tinalakay rin ng dalawang lider ang kooperasyon sa depensa, maritime cooperation, kalakalan at pamumuhunan, renewable energy, climate change, at labor cooperation.
Ayon sa Pangulo, mahalaga rin ang naging ambag ng Germany sa modernisasyon ng Philippine Coast Guard, kabilang ang pagkakaloob ng mga helicopter at unmanned aerial vehicles o drones.
Muling binigyang-diin ng Pangulo ang hangarin ng Pilipinas na higit pang palalimin ang ugnayan at kooperasyon sa Germany sa mga susunod na taon.
