Tiniyak ni Pangulong Ferdinand Marcos Jr. na ipagpapatuloy ng kanyang administrasyon ang mga reporma sa edukasyon at palalakasin pa ang mga programang nasimulan na para mapabuti ang kalidad ng pagkatuto ng mga Pilipinong mag-aaral.
Ito ay matapos tanggapin ng Pangulo ang Final Report ng Second Congressional Commission on Education o EDCOM II sa isang seremonya sa Malacañang, kasabay ng paglulunsad ng National Education and Workforce Development Plan o NatPlan 2026–2035 na magsisilbing roadmap ng mga reporma sa edukasyon sa susunod na sampung taon.
Ayon sa Pangulo, mula pa noong simula ng kanyang termino ay nakikipagtulungan na ang pamahalaan sa EDCOM II upang maitugma ang mga reporma ng gobyerno sa mga rekomendasyon ng komisyon.
Kabilang sa mga hakbang ng pamahalaan ang pagrebisa ng basic education curriculum upang maging mas simple, learner-centered, at skill-focused. Pinunan din ang mga teaching at non-teaching positions upang mas makapagtuon ang mga guro sa pagtuturo, kasabay ng pagpapatupad ng expanded career progression system.
Pinalakas din ang school facilities sa pamamagitan ng electrification ng mga paaralan at pagbibigay ng computers at internet connectivity.
Gagamitin ang pondo para kumuha ng mas maraming public school teachers, palawakin ang learning recovery programs sa reading, math, at science, dagdagan ang school-based feeding programs, at magpatayo ng mas maraming classrooms.
Kasama rin sa mga programa ang pagpapalakas ng YAKAP Caravans ng DepEd at PhilHealth para sa primary healthcare ng mga mag-aaral at school personnel, pati ang paglalaan ng mahigit ₱182 milyon para sa scholarships sa master’s degrees at Technical-Vocational Education and Training.
Sa huli, iginiit ng Pangulo na tuloy-tuloy ang mga reporma upang matiyak na makatatanggap ang bawat Pilipinong mag-aaral ng dekalidad na edukasyon.
