Labis ang sinapit ng isang pasahero matapos mahulog sa sinasakyang pampasaherong jeep dahil sa umano'y agresibong pagmamaneho ng driver habang bumibiyahe sa pampublikong kalsada.
Batay sa viral video na nakarating sa Land Transportation Office (LTO), makikitang ilang beses umanong nagsagawa ng swerving o agresibong pagmamaniobra ang jeepney driver, na naging dahilan ng pagkahulog at pagkasugat ng isa sa mga pasahero.
Lumabas din sa imbestigasyon na hindi umano huminto ang driver upang tulungan ang biktima matapos ang insidente.
Dahil dito, agad na naglabas ang LTO ng Show Cause Order (SCO) laban sa driver at sa rehistradong may-ari ng jeepney upang magpaliwanag sa insidente.
Isinailalim din sa 90-days preventive suspension ang driver's license ng sangkot na driver habang dinidinig ang kaso.
Inilagay rin sa alarm ang naturang jeepney upang hindi ito mailipat o maisailalim sa anumang transaksyon habang nagpapatuloy ang imbestigasyon.
