Pinalagan ng Malacañang ang mga pahayag ni Senador Imee Marcos laban sa administrasyon sa isinagawang rally ng Iglesia ni Cristo kagabi, kung saan binatikos nito ang pamahalaan at sinabing "tulog" at "lasing sa kapangyarihan."
Ayon kay Palace Press Officer Claire Castro, hindi lamang fake news kundi paghahasik din ng poot ang mga naging pahayag ng senadora dahil lalo lamang umano nitong pinaiigting ang galit ng publiko laban sa gobyerno sa pamamagitan ng maling impormasyon.
Tinawag din ng Palasyo na isang 'obstructionist' si Senadora Marcos na gumagamit umano ng mga kwentong walang basehan upang siraan ang Pangulo at ang administrasyon.
Hindi rin umano alam ng opisyal kung nagbubulag-bulagan lang ang senadora sa mga totoong programa ng gobyerno upang gamitin ang mga ito sa paninira sa administrasyon.
Anya, patuloy ang pagpapatupad ng iba't ibang programa ng gobyerno, kabilang ang livelihood grants at food assistance na naipamahagi sa iba't ibang bahagi ng bansa nitong mga nakalipas na buwan.
Kasabay nito, kinwestiyon din ni Castro kung bakit nanahimik umano ang senadora noong umamin si dating pangulong Rodrigo Duterte sa paggamit ng ilegal na droga, gayong kilala na anya nito ang dating Pangulo at wala naman itong naging pagpuna noon.
Binalikan din ng Malacañang ang usapin ng mga maanomalyang flood control projects at kinwestyon kung bakit ngayon lamang naging kritikal ang senadora gayong noong 2018 pa lamang ay may mga ulat na ng ghost projects at noong 2020 ay umamin daw mismo ang dating Pangulo na may mga ghost projects, ngunit wala umanong naging katulad na malawakang imbestigasyon noon.
Naniniwala rin si Castro na may bahid ng pulitika ang mga pahayag ng senadora dahil noon pa man daw ay nais na nitong mapaalis sa pwesto ang Pangulo upang mailuklok ang kaibigan nyang si Vice President Sara Duterte.
Sa kabila nito, nilinaw ng Malacañang na hindi mag-uutos si Pangulong Ferdinand Marcos Jr. ng anumang imbestigasyon laban sa kanyang kapatid at nasa mga kinauukulang ahensya ang pagpapasya kung may paglabag na dapat imbestigahan.
