Ipinagmalaki ni Pangulong Ferdinand Marcos Jr. ang pinalawak na mga programa ng pamahalaan para sa isports at kalusugan, kabilang ang Universal Health Care, YAKAP at GAMOT programs, gayundin ang mas mataas na benepisyo ng PhilHealth.
Sa kanyang State of the Nation Address (SONA), sinabi ng Pangulo na patuloy na isinusulong ng pamahalaan ang malusog na pamumuhay sa pamamagitan ng kumpletong pagbabakuna, wastong nutrisyon, regular na ehersisyo, at pag-iwas sa bisyo at iba pang mapanganib na gawain.
Binigyang-diin din niya ang mas malaking suporta ng administrasyon sa sports, na aniya ay tatlong beses nang itinaas.
Inaasahan niyang mahihikayat ang mas maraming Pilipino na maglaro ng iba't ibang sports sa inspirasyon ng mga atletang tulad ni Alex Eala at ng Filipinas women's football team.
Biro pa ng Pangulo, balang araw daw ay baka mapasama na rin ang Pilipinas sa World Cup.
Ayon sa Pangulo, patuloy ring pinalalakas ang Universal Health Care sa pamamagitan ng YAKAP Program na nakatuon sa maagap na pagtukoy at pag-iwas sa sakit.
Sa kasalukuyan, nasa 4.5 milyong Pilipino na ang nakapagpatingin sa ilalim ng programa mula sa mahigit 25 milyong nakarehistro rito.
Sinabi rin ni Marcos na palalawakin pa ang YAKAP Program upang mas maraming klinika ang makalahok at mas marami pang mamamayan ang mabigyan ng serbisyong pangkalusugan.
Sa ilalim naman ng GAMOT Program, sinabi ng Pangulo na maaaring makakuha ang mga miyembro ng PhilHealth ng mga kinakailangang gamot mula sa mahigit 2,000 accredited providers, na may benepisyong hanggang P20,000 bawat taon.
Sa ngayon, 75 mahahalagang gamot na ang sakop ng programa, kabilang ang para sa diabetes, altapresyon, cholesterol, hika, ubo, lagnat, at iba pang karaniwang sakit.
Mahigit 300,000 katao na ang nakinabang dito sa loob lamang ng pitong buwan ngayong taon.
Idinagdag din ng Pangulo na mahigit 2,000 gamot na ang inalisan ng value-added tax o VAT, kabilang ang mga gamot laban sa kanser, altapresyon, diabetes, at mental health conditions, na nagresulta sa mas mababang presyo ng mga ito sa mga botika.
Inihayag din ni Marcos na simula sa susunod na taon ay unti-unti nang isasama sa YAKAP Program ang iba't ibang blood tests at mga gamot upang mas maagang matukoy ang mga posibleng sakit sa bato, atay, thyroid, at hepatitis B.
Samantala, sinabi rin ng Pangulo na patuloy na dinaragdagan ng PhilHealth ang mga sakit at serbisyong sakop ng kanilang mga benepisyo, kabilang ang paggamot sa cancer, sakit sa puso, HIV/AIDS, at tuberculosis.
Inanunsyo rin niya ang pagdodoble ng PhilHealth package para sa mga batang may developmental disabilities at ang pagtaas ng bilang ng therapy sessions na sasagutin ng ahensya mula 90 hanggang 150 kada taon.
