Nakiisa si Pangulong Ferdinand Marcos Jr. sa pagdiriwang ng 31st Migrant Workers Day ngayong Linggo, Hunyo 7.
Sa kanyang mensahe, kinilala at binigyang-pugay ng Pangulo ang sakripisyo, dedikasyon, at katatagan ng mga OFWs na nakikipagsapalaran sa malayo para lamang mabigyan ng mas magandang buhay ang kanilang mga pamilya.
Aniya, patuloy ang pagsisikap ng pamahalaan na pangalagaan ang kapakanan ng mga migranteng manggagawa at tiyaking may sapat na suporta para sa kanila at sa kanilang mga mahal sa buhay.
Tiniyak din ng Pangulo na mananatiling handa ang gobyerno na magbigay ng kinakailangang tulong sa oras ng pangangailangan, sapat na proteksyon habang sila ay nasa ibang bansa, at mas malinaw na mga oportunidad sa kanilang pagbabalik at muling pagsisimula sa Pilipinas.
