Ipinagmalaki ni Pangulong Ferdinand Marcos Jr. ang mga repormang ipinatupad ng pamahalaan sa serbisyong pangkalusugan, kabilang ang pagpapadali sa pagkuha ng medical assistance at pagpapalawak ng benepisyo ng PhilHealth.
Sa kanyang State of the Nation Address (SONA), inanunsyo ng Pangulo na dodoblehin ang PhilHealth package para sa konsultasyon at therapy ng mga batang may developmental disabilities.
Itataas din mula 90 hanggang 150 ang bilang ng therapy sessions na sasagutin ng PhilHealth kada taon.
Ayon kay Marcos, mula sa mahigit limang milyong pamilyang gumamit ng PhilHealth noong 2022, umabot na sa higit 7.5 milyong pamilya ang nakinabang sa mga benepisyo nito noong nakaraang taon.
Aniya, bunga ito ng pinaigting na pagpaparehistro ng mga miyembro at mas mabilis na pagproseso ng bayad sa mga ospital at healthcare providers.
Sinabi rin ng Pangulo na mula nang ilunsad ang Zero-Balance Billing matapos ang kanyang nakaraang SONA, halos tatlong milyong Pilipino na ang nakapagpagamot sa mga ward ng mga ospital ng Department of Health (DOH) nang walang binayarang kahit isang sentimo.
Binigyang-diin din ni Marcos ang mga pagbabago sa Medical Assistance to Indigent and Financially Incapacitated Patients o MAIFIP.
Ayon sa kanya, mas marami nang ospital ang sakop ng programa at mas pinadali na ang proseso ng pag-avail ng tulong medikal.
Inihayag din ng Pangulo na inilunsad na ang e-MAIFIP sa mga ospital ng DOH at isinama na ito sa eGovPH app.
Dalawang requirements na lamang ang kailangan ng aplikante, at inalis na rin ang paggamit ng guarantee letter o GL.
Dahil dito, sinabi ni Marcos na hindi na kailangang pumila o lumapit pa sa mga pulitiko upang makahingi ng guarantee letter para makakuha ng tulong medikal.
