Hinamon ni House trial spokesperson Zia Alonto Adiong si Vice President Sara Duterte na personal na dumalo sa Senate impeachment court para sa kanyang paglilitis sa Lunes.
Ayon kay Adiong, ang personal na paglahok ni Duterte sa paglilitis ang pinakamalakas na mensaheng maihahatid sa mga Pilipino na handa siyang sagutin ang mga alegasyon.
Ito rin aniya ang magpapatibay sa naunang pahayag ng kampo ni VP Sara na sasagutin nila ang mga paratang sa proper forum.
Punto nito, wala nang dahilan ang defense team para hindi sumipot si Duterte dahil base na rin sa kanilang argumento ay haharapin niya ang mga alegasyon.
Bukod dito, isa umano itong paraan upang linawin na hindi siya guilty sa mga akusasyon.
Gayunman, binigyang-diin ni Adiong na sa confirmination hearings pa lamang sana sa Kamara ay nagprisinta na ng paliwanag ang pangalawang pangulo pero mas pinili niyang isantabi ito.
Mababatid na nabigyan na ng notice ang kampo ng defense na nag-uutos kay Duterte na humarap sa paglilitis sa Lunes o sa pamamagitan ng kanyang counsel.
