Kinuwestiyon sa Korte Suprema ang konstitusyonalidad ng Bangsamoro Autonomy Act o BAA No. 85, na nagsisilbing 2026 General Appropriations Act ng Bangsamoro Autonomous Region in Muslim Mindanao (BARMM).
Sa inihaing petisyon, iginiit ng mga petitioner na labag umano sa Saligang Batas at sa Bangsamoro Organic Law ang ilang probisyon ng nasabing batas, kaya’t hiniling nilang ideklara itong unconstitutional.
Kasabay nito, humirit din sila ng Temporary Restraining Order (TRO) at/o Writ of Preliminary Injunction upang agad na mapatigil ang paglalabas at paggamit ng pondong umaabot sa ₱114.07 bilyon habang dinidinig pa ang kaso.
Ayon sa kampo ng mga petitioner, mahalagang masiguro na ang paggamit ng pondo ng bayan ay naaayon sa batas, lalo na sa gitna ng mga hamon sa pamamahala sa rehiyon. Anila, may mga probisyon umano sa BAA No. 85 na sumasalungat sa mga pangunahing prinsipyo ng Konstitusyon at ng Bangsamoro Organic Law.
Matatandaang noong nakaraang taon, naglabas na rin ng desisyon ang Korte Suprema na nagdedeklarang unconstitutional sa ilang batas ng BARMM, kabilang ang BAA No. 77, dahil sa mga legal na iregularidad.
Ang panibagong petisyon laban sa BAA No. 85 ay itinuturing na hakbang upang higit pang mapagtibay ang pananagutan at pagsunod sa rule of law sa Bangsamoro.
