Ipinunto ng Office of the Solicitor General (OSG) na dapat ibasura ng Supreme Court ang petisyon na humihiling na sumailalim si Pangulong Ferdinand Marcos Jr. sa drug test at iba pang medical examination, dahil taliwas ito sa umiiral na doktrina ng presidential immunity.
Sa kanilang komento, binigyang diin ang naunang ruling sa kasong De Lima v. Duterte, kung saan kinilala ng Korte Suprema na ang pagsasangkot sa Pangulo sa mga kaso ay nagiging sagabal sa kanyang tungkulin.
Kahit alisin umano ang Pangulo bilang respondent, direkta itong nangangailangan ng kanyang oras at personal na partisipasyon, na hindi maaaring ipasa sa iba.
Binigyang-diin ng OSG na kung papayagang umusad ang petisyon, maaabala ang Pangulo at maaapektuhan ang kanyang kakayahang gampanan ang mahahalagang tungkulin ng gobyerno.
Kaya’t batay sa umiiral na jurisprudence, nararapat umanong ibasura ang petisyon.
Bukod dito, iginiit din ng OSG na walang sapat na legal standing ang mga petitioner, at wala ring malinaw na constitutional basis ang kanilang kahilingan.
Anila, hindi sapat ang pagiging botante o taxpayer upang maghain ng ganitong uri ng kaso, lalo na’t walang direktang pinsalang naipakita.
