Umakyat ng tatlong puwesto ang Philippine passport sa pinakahuling Henley Passport Index, matapos itong pumuwesto sa ika-72 pwesto ngayong 2026 mula sa ika-75 noong nakaraang taon.
Ito na rin ang pinakamataas na ranggo ng bansa sa naturang talaan mula pa noong 2014.
Batay sa index, maaaring makapasok ang mga may hawak ng Philippine passport sa 65 bansa nang hindi na kinakailangang kumuha ng visa bago bumiyahe.
Nakapantay ng Pilipinas sa ika-72 pwesto ang mga bansang Benin at Uganda.
Nangunguna pa rin ang Singapore bilang pinakamalakas na passport sa mundo na may visa-free access sa 192 destinasyon.
Sa Southeast Asia, mas mataas ang ranggo ng Singapore, Malaysia, Brunei, Timor-Leste, Thailand, at Indonesia kaysa sa Pilipinas, habang mas mababa naman ang Vietnam, Cambodia, Laos, at Myanmar.
Ayon sa Henley & Partners, patuloy na lumalawak ang visa-free access ng mga passport sa buong mundo sa kabila ng umiiral na mga pandaigdigang hamon at tensyon.
