Nakahanda ang Philippine Fiber Industry Development Authority Bicol sa inaasahang epekto ng El Niño phenomenon sa industriya ng mga abaca at iba pang mga fiber crops.
Sa panayam ng Brigada News FM Legazpi kay PHILFIDA Bicol Regional Director Mary Anne Molina, sinabi niya na kabilang sa kanilang mga action plan ay ang information dissemination lalo na sa mga magsasaka.
Aniya, hinihikayat nila ang kanilang mga field technician na i-demonstrate ang “mulching” ng mga abaca plants o ang pagtatakip ng lupa sa paligid ng mga abaca upang mapanatili ang moisture content at hindi matuyo.
Sinabi pa ni Molina na pinapayuhan nila ang mga magsasaka na iwasan ang underbrushing o ang paglilinis o pag-aalis ng mga damo upang maprotektahan ang soil cover.
Gayundin, pinapayuhan din ang ibang mga magsasaka na pansamantalang huwang munang gagamit ng mga fertilizer ngayong dry season. Samantala, sinabi ni Molina na makikipag-ugnayan din sila sa PCIC para sa insurance coverage at orientation para sa mga abaca farmers.
