Hindi pa nakikita ng Philippine Institute of Volcanology and Seismology ang ilang mga phenomena sa Bulkang Mayon para itaas ito sa alert level 4 status.
Sa panayam ng Brigada News FM Legazpi kay PHIVOLCS Supervising Science Research Specialist Dr. Paul Alanis, sinabi niya na base sa mga aktibidad ng bulkan ngayon, wala itong lava fountaining o maliliit na pagputok, gayundin, ang mga naitatalang pyroclastic density currents o uson ay nasa loob lamang ng 6 kilometers permanent danger zone.
Aniya, hindi nga ito umabot sa 6 kilometers, kundi nasa 2 kilometers lamang ang pinakamahaba.
Binigyang diin ni Alanis, ito yung mga phenomena na hindi pa nila nakikita sa ngayon kung kaya’t wala pang dahilan para itaas ang alerto nito.
Sa ngayon, nananatili sa alert level 3 ang status ng Mayon, at mahigpit pa rin ang paalala ng PHIVOLCS ukol sa panganib na dulot ng mga aktibidad ng bulkan, kung kaya’t ipinagbabawal ang pagpasok sa 6 kilometers PDZ.
