Kinumpirma ng Philippine Coast Guard (PCG) na hinarass at tinangkang guluhin ng mga barko ng China ang isang Pilipinong mangingisda sa bahagi ng Bajo de Masinloc.
Ayon kay PCG Spokesperson Commodore Jay Tarriela, nangyari ang insidente habang pumapalaot ang mga mangingisda sa kanlurang bahagi ng shoal.
Lumapit umano sa daraanan ng kanilang bangka ang People’s Liberation Army Navy (PLAN 621) at isang barko ng China Coast Guard (CCGV 23521) hanggang 30 metro at nagpatunog pa ng sirena.
Sinubukan pa ng kapitan ng FFB Prince LJ na iwasan ang mga barko ng China sa pamamagitan ng pagbabago ng ruta patungong timog-silangan, ngunit sinabi niyang sinundan pa rin sila ng mga barko ng CCG.
Agad namang rumesponde ang PCG upang protektahan ang mangingisda at magbigay ng agarang medikal na atensyon.
Bilang karagdagang tulong, naglipat din ang Coast Guard ng 10 container ng diesel sa barkong pangisda upang maipagpatuloy nito ang kaniyang operasyon.
Tiniyak naman ng PCG na tuloy-tuloy ang kanilang mahigpit pagbabantay sa karagatan ng Pilipinas at patuloy nilang pinoprotektahan ang mga mangingisdang Pilipino, kasama na ang pagtataguyod ng kanilang karapatan sa karagatang sakop ng bansa.
